Maraman, adverbi occitan que vòl dir “tot d’en crep, a surpresa”: abo l’esprit del nòu e d’la surpresa lhi musèus e ponchs expositius des Valadas Maira, Grana e Estura se presenton ensemp per donar una ofèrta globala del “paisatge cultural” que caracteriza aquestas tre valadas del Piemont.
Musèus, racòltas e exposicions del circuit Maraman conton una istòria, antica e modèrna, d’òmes e tèrras, de trabalh e passions: l’antica vocacion agricol-pastorala, la lenga e la cultura occitana, l’intuicion d’esfruchar resorças da ren dir e lo coratge de partir enventant de mestiers itinerants.
Ental grop Maraman chasque musèu presenta d’iniciativas e sosten tuchi lhi autres, abo la volontat de trabalhar ensemp per organizar e esvilupar una ofèrta culturala unitaria e dinamica, ente chasqu’un sie pensat coma “pòst amìs” que pòl proponer, exaltar e tramandar aquel patrimòni d’memòrias e coneissenças que pòl contar son territòri.
Pas mec aquò qu’es estat e es pas pus, mas decò aquò que continua a creisser e viure.
Lo projèct es presentat da las Unions Montanas des Valadas Maira, Grana e Estura, coordinat da Espaci Occitan e sostengut da la Region Piemont.
L’iniciativa fai part des activitats d’la Carta Europea del Torisme Sostenible del Viso.